Me iniciativën e Ministrisë së Arsimit, Shkencës dhe Inovacionit, këshillat shkollorë të shkollave fillore dhe të mesme në Mal të Zi kanë marrë vendim për ndalimin e përdorimit të celularëve gjatë orëve të mësimit, me përjashtim të rasteve kur përdorimi i tyre nga mësuesi lëndor parashikohet si mjet mësimor për realizimin e njësive të caktuara mësimore përmes përgatitjes ditore, mësohet nga kjo ministri, shkruan Ulqini Online.
“Vendimi parashikon edhe rrethana të veçanta (emergjenca, arsye shëndetësore etj.) në të cilat nxënësit, me miratimin e mësuesit lëndor apo të administratës së shkollës, mund të përdorin celularin”, thekson ministria.
Në ditët në vijim Ministria e Arsimit, Shkencës dhe Inovacionit në bashkëpunim me shkollat do të krijojë parakushtet e nevojshme për zbatimin e plotë të vendimit të miratuar.
“Praktika krahasuese në një sërë vendesh ka treguar se heqja e telefonave celularë në shkolla gjeneron efekte pozitive në rezultatet e arritura nga nxënësit në procesin arsimor, ndaj është mjaft e pritshme dhe e regjistruar që ka pasur një rritje të numrit të vendeve që, përgjithësisht ose brenda institucioneve arsimore individuale, vendosin forma të ndryshme të ndalimit të pjesshëm ose të plotë të përdorimit të celularëve në shkolla”, thekson Ministria.